Кулун тутар 8 күнүгэр Балаҕаччы нэһилиэгэр Аан Дойду дьахталларын күнүгэр анаан «Кэрэчээнэ Куо 2023»
улуустааҕы күрэх буолан ааста. Бүлүүттэн, Бөтүҥтэн, Кыргыдайтан уонна Балаҕаччыттан холбоон 7 кыталык кыыс буолан
“Кэрэчээнэ Куо 2023” анал аат иһин күөн көрүстүлэр.
Дьүүллүүр сүбэ састаабыгар нэһилиэк аайыттан киирдилэр. Дьүүллүүр сүбэ кыргыттар көстөр дьүһүннэрин, кэрэ бэйэлэрин, сыанаҕа туттан-хаптан хаамыыларын, өйдөрүн- санааларын, саҥарар саҥаларын, толкуйдарын барытын көрөн-истэн сыаналаатылар.
Күрэх 5 түһүмэхтээх буолбута. Манна кыргыттар бэйэлэрин билиһиннэрэн, ураты дьо5урдарын көрдөрөн, араас дойду үҥкүүлэрин көрдөрөн, ылбаҕай ырыаларын бэлэхтээн көрөөччүлэр биһирэбиллэрин ыллылар. Түһүмэхтэр быыстарыгар нэһилиэк олохтоохторо, ыалдьыттара ыллаан-туойан күрэҕи киэргэттилэр.
«Кэрэчээнэ Куо 2023» түмүгүнэн «Кэрэчээнэ Куо 2023» ааты - Катя Томская (Бүлүү к.) ылла. “Көрөөччү биһирэбилэ” анал ааты-Ларьяна Алексеева (Балаҕаччы) уонна кыттыбыт кыргыттарга хас биирдиилэригэр анал аат иҥэрилиннэ.
