Улуу Кыайыы 80 сылын көрсө Өрөспүүбүлүкэтээҕи Кыайыы Знамята Саха Сирин бары улуустарыгар сылдьан баран ыам ыйын 9 күнүгэр Өрөспүүбүлүкэбит киин куоратыгар тиийиэхтээх. Олунньу 13 күнүгэр Бүлүү улууһугар Кыайыы Знамятын туттарыы Горнай уонна Бүлүү улуустарын границатыгар буолбута. Олунньу 15 күнүгэр Кыайыы кыһыл знамятын айхаллыы көрүстүбүт дьоһун дьоннордоох, бастыҥ мааны ыччаттардаах икки Герой дойдута Балаҕаччы нэһилиэгэ. Мастаах түөлбэтин ыаллыы сытар нэһилиэктэрэ: Халбаакы, Кыргыдай, Хаҕын делегациялара кэлэннэр Улуу Кыайыы 80 сыллаах үбүлүөйүн көрсө Кыайыы знамятын «Бары бииргэ — Кыайыыга» диэн девизтээх эстафетаны туттулар. Кэлбит ыалдьыттар нэһилиэкпит «Албан аат» мемориалыгар эйэлээх халлаан туһугар олохторун толук уурбут буойуттарбыт кэриэстэригэр, Сэбиэскэй Сойуус Дьоруойдара А.А. Миронов, Н.С. Степанов бюстарыгар өйдөбүнньүк гирлянда уурдулар. Бүлүү улууһун баһылыгын бастакы солбуйааччыта Иван Иванович Евсеев “Халбаахы нэһилиэгэ” тыа сирин түөлбэтин баһылыга Алексей Иванович Васильев, “Хаҕын нэһилиэгэ” тыа сирин түөлбэтин баһылыга Роман Романович Софронов, “Кыргыдай нэһилиэгэ” тыа сирин түөлбэтин баһылыгын солбуйааччыта Иван Юрьиевич Винокуров уонна Бэтэрээн сэбиэтин бэрэсэдээтэлин солбуйааччыта Егор Егорович Рожин.
А.А. Миронов аатынан Мастаах орто оскуолатын дьиэтигэр “Кыайыы знамятын” кэлбит тыа сирин түөлбэтин баһылыктара «То5ус нэһилиэгэ» тыа сирин түөлбэтин баһылыгар Афанасий Васильевич Васильевка туттардылар. Знамяны көрсүү олус долгуттулаахтык өрө көтөҕүллүүлээхтик ааста. Көрсүһүү Сэбиэскэй Сойуус геройа Алексей Афанасьевич Миронов аатынан Мастаах орто оскуолатын знамя тутааччыларын залы эргийэ бочуот эргииринэн, Николай Никифоров толоруутугар олохтоох мелодист, ааптар Иннокентий Алексеевич Дмитириев тыла, матыыба “Обелиск” ырыаннан түмүктэннэ.
