Бүлүү улууһун Балаҕаччы нэһилиэгэр Дмитрий Тимофеевич Михайлов — Балаҕаччыыныскай аатын үйэтитэр сыаллаах 17 төгүлүн ыытыллар улуустааҕы «Мастаах саһарҕата-2025» ырыа куонкурса олунньу 15 күнүгэр буолан ааста.
Күрэххэ ырыа- тойук аргыстаах 35 оҕо уһуйаан саастаах уонна оскуола оҕолоро Бүлүү, Халбаакы, Тааһаҕар, Кыргыдай, Хаҕын нэһилиэктэриттэн кэлэн кытыннылар. Кэнчээри ыччат инники сайдар суолун түстүүр бигэ туруктаах, киэҥ билиилээх, сайдыылаах буоларга түстүүр, ыллыыр-туойар дьоҕуру сайыннарар, уостан түспэт ырыалары үйэтитэр, дойдуга тапталы күүһүрдэр ырыа бырааһынньыга үрдүк таһымҥа ааста.
Күрэхпит тэрээһинигэр күүс-көмө буолбут спонсордарбытыгар, тэрээһин көхтөөхтүк ааһарыгар илин-кэлин түһүспүт көмөлөһөөччүлэрбитигэр БАРҔА МАХТАЛБЫТЫН тиэрдэбит!
Сыралаах үлэҕитигэр харгыстары көрсүбэккэ, дьоҥҥо сэргэҕэ көмө буолан, куруук ситиһии сиэтиилээх, инникигит диэкки киэҥник хардыылаан иһиҥ, баай талым олохтонуҥ, чэгиэн, доруобай буолуҥ!
Күндү күрэхпит кыттааччыларыгар, салайааччыларыгар уонна төрөппүттэргэ, бу кэрэ күммүтүн киэргэтэн, кыттыыны ылбыккытыгар эһиэхэ улахан махтал тылларын этэн тураммыт бары үчүгэйи, дьоллоох оҕо сааһы, үөрүүнү-көтүүнү, чэгиэн туругу баҕарабыт!
Кылаан кыайыылаах Д.А.Гуляев аатынан Кыргыдай орто оскуолатын 5 кылааһын үөрэнээччитэ Александр Наумов Улуу Кыайыы 80 сылын көрсө «Ветераннар» диэн ырыатынан Кылаан кыайыылаах үрдүк аатын иҥэриннэ. Кыайыылааха өссө да үрдүктэн үрдүк ситиһиилэри, үүнэ-сайда тур диэн баҕа санаабытын этэбит.
